ਸ਼ਾਹਕੋਟ/24 ਮਈ: ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸਰਦਾਰ ਸੁਖਬੀਰ ਸਿੰਘ ਬਾਦਲ ਸ਼ਾਹਕੋਟ ਵਿਚ ਚੋਣ ਪ੍ਰਚਾਰ ਦੇ ਆਖਰੀ ਦਿਨ ਅਕਾਲੀ ਦਲ ਦੇ ਉਮੀਦਵਾਰ ਸਰਦਾਰ ਨਾਇਬ ਸਿੰਘ ਕੋਹਾੜ ਦੇ ਹੱਕ ਵਿਚ ਕੱਢੇ ਜਾਣ ਵਾਲੇ ਇੱਕ ਰੋਡ ਸ਼ੋਅ ਦੀ ਅਗਵਾਈ ਕਰਨਗੇ।
ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਇੱਕ ਪਾਰਟੀ ਬੁਲਾਰੇ ਨੇ ਦੱਸਿਆ ਕਿ ਇਹ ਰੋਡ ਸ਼ੋਅ ਮਲਸੀਆਂ ਰੋਡ ਤੋਂ ਸਵੇਰੇ 10 ਵਜੇ ਸ਼ੁਰੂ ਹੋ ਕੇ ਸ਼ਾਮੀ 4:45 ਉੱਤੇ ਮਹਿਤਪੁਰ ਦੀ ਅਨਾਜ ਮੰਡੀ ਵਿਚ ਜਾ ਕੇ ਮੁਕੰਮਲ ਹੋਵੇਗਾ। ਉਹਨਾਂ ਕਿਹਾ ਕਿ ਮਲਸੀਆਂ ਤੋਂ ਇਹ ਰੋਡ ਸ਼ੋਅ ਰੂਪੇਵਾਲ ਚੌਂਕ, ਸੀਚੇਵਾਲ ਮੰਡੀ, ਨਿਹਾਲੂਵਾਲ ਅੱਡਾ ਅਤੇ ਤਾਸ਼ਪੁਰ ਅੱਡੇ ਵਿਚੋਂ ਹੁੰਦਾ ਹੋਇਆ ਇੱਕ ਘੰਟੇ ਵਿਚ ਟਰੱਕ ਯੂਨੀਅਨ ਲੋਹੀਆਂ ਵਿਖੇ ਪਹੁੰਚੇਗਾ।
ਉਹਨਾਂ ਅੱਗੇ ਦੱਸਿਆ ਕਿ ਇਸ ਰੋਡ ਸ਼ੋਅ ਦਾ ਦੂਜਾ ਪੜਾਅ 11 ਵਜੇ ਲੋਹੀਆਂ ਤੋਂ ਸ਼ੁਰੂ ਹੋਵੇਗਾ ਅਤੇ ਨਵਾਂ ਪਿੰਡ ਖਾਲੇਵਾਲ, ਅੱਡਾ ਕੰਗ  ਖੁਰਦ, ਕੱਕੜ ਕਲਾਂ, ਪੂਨੀਆਂ, ਨਵਾਂ ਪਿੰਡ ਅਕਾਲੀਆਂ, ਮਾਣਕਪੁਰ, ਅੱਡਾ ਕੋਹਾੜ ਖੁਰਦ, ਜਫ਼ਰਵਾਲ ਅਤੇ ਸਾਰੰਗਵਾਲ ਵਿਚੋਂ ਦੀ ਹੁੰਦਾ ਹੋਇਆ ਦੁਪਹਿਰ ਇੱਕ ਵਜੇ ਸ਼ਾਹਕੋਟ ਅੱਪੜੇਗਾ। ਉਹਨਾਂ ਕਿਹਾ ਰੋਡ ਸ਼ੋਅ ਦੌਰਾਨ ਅਕਾਲੀ ਦਲ ਦੇ ਪ੍ਰਧਾਨ ਲੋਕਾਂ ਨਾਲ ਗੱਲਬਾਤ ਕਰਦੇ ਹੋਏ ਉਹਨਾਂ ਨੂੰ ਅਕਾਲੀ ਉਮੀਦਵਾਰ ਸਰਦਾਰ ਕੋਹਾੜ ਦੀ ਜਿੱਤ ਯਕੀਨੀ ਬਣਾਉਣ ਦੀ ਅਪੀਲ ਕਰਨਗੇ।
ਬੁਲਾਰੇ ਨੇ ਦੱਸਿਆ ਕਿ ਸ਼ਾਹਕੋਟ ਪਹੁੰਚਣ ਤੋਂ ਬਾਅਦ ਰੋਡ ਸ਼ੋਅ ਮਨੋਹਰ ਹਸਪਤਾਲ ਅਤੇ ਬੱਸ ਅੱਡੇ ਦੇ ਅੱਗੇ ਤੋਂ ਗੁਜ਼ਰਦਾ ਹੋਇਆ ਮੋਗਾ ਦੀ ਮੁੱਖ ਸੜਕ ਉੱਤੇ ਪੁੱਜੇਗਾ ਅਤੇ ਉਸ ਤੋਂ ਬਾਅਦ ਪਰਜੀਆਂ ਕਲਾਂ ਮੋੜ ਤੋਂ ਇਹ ਰੋਡ ਸੋਥਅ ਬੱਗਾ, ਪਰਜੀਆਂ, ਅੱਡਾ ਊਦੋਵਾਲ, ਬੁਲੰਦਾ ਅਤੇ ਰਾਮੂਵਾਲ ਵਿਚੋਂ ਦੀ ਲੰਘਦਾ ਹੋਇਆ ਦੁਪਹਿਰ 2 ਵਜੇ ਆਪਣੀ ਆਖਰੀ ਟਿਕਾਣੇ ਮਹਿਤਪੁਰ ਵਿਖੇ ਪਹੁੰਚੇਗਾ।
ਉਹਨਾਂ ਅੱਗੇ ਦੱਸਿਆ ਕਿ ਅਕਾਲੀ ਦਲ ਦੇ ਪ੍ਰਧਾਨ ਦੀ ਅਗਵਾਈ ਵਿਚ ਕੱਢਿਆ ਜਾਣ ਵਾਲਾ ਇਹ ਰੋਡ ਸ਼ੋਅ ਮਹਿਤਪੁਰ ਦੇ ਮੁੱਖ ਬਾਜ਼ਾਰ ਵਿਚੋਂ ਲੰਘਦਾ ਹੋਇਆ ਸ਼ਾਮੀ ਅਨਾਜ ਮੰਡੀ ਵਿਚ ਜਾ ਕੇ ਮੁਕੰਮਲ ਹੋ ਜਾਵੇਗਾ।